ARMAIS

ARMAIS

frater Sesostris, hôc in Asiam cum exercitu profectô, domi relictus, ut regnum interea administraret, aliquandiu fidem servavit. Postmodum, potestate Tyrannice abusus, contra fratris iussa, omnia insolenter patrare coepit: tandem et diadema sibi rapuit, ac in fratrem insurrexit. Quod cum per summum Aegypti Sacerdotem Sesostri innotuisset, ille post 9. annorum absentiam reversus fratrem supplicis schemate obvium habuit, regnumque recuperavit. Verum is Regem cum uxore et liberis conviviô exceptum insidiis appetiit: illisque a potu largiore consopitis magnam siccae arundinis vim, iam pridem ad hoc destinatam tabernaculo Regis noctu circum gessit atque incendit: Ubi satellites Regis vinô graves cum segniter opem ferrent, Sesostris manibus porrectis vota pro filiorum et uxoris salute suscipiens, per flammas evasit; et, praeter spem servatus, donariis tum alios Deos, tum Vulcanum maxime veneratus est, utpote cuius beneficiô salus ipsi contigisset. Diodor. Sic l. 1. de fratre dein pro meritis ultionem sumpsit, Herodot. l. 2. c. 107. ubi quod de duobus Sesostris filiis per ignem sese extendentibus, ut parentes super illos transire possent, addit, deceptum a Sacerdotibus Aegyptiis iudicat Marshamus. Coeterum Manetho (certe non ex Aegyptiorum scriniis, verum ex Graecorum Mythologia) Armaim hunc Danaum illum fuisse tradit, qui quatuor ante saeculis in Graeciam navigavit apud Iosephum contra Apionem, unde quanta apud Graecos remporum, confusio, liquet. Vide Ioh. Marshamum Canone Chron. Sec. XIV.